“Kalean neskatila bat hotzak kikilduta ikusi nuen… Ez
zuen jatordu berorik egingo zuen antzik. Haserretu egin nintzen eta zera esan
nion Jainkoari: Zergatik gertatzen dira gauza hauek? Zergatik ez duzu hau
konpontzeko ezer egiten?
Unetxo batean, Jainkoa isilik egon zen, baina gau hartan
bat-batean erantzun zidan: “Hara, zerbait egin dut bai. Zeu egin zaitut”.
Ni?
Bai, “zeu egin zaitut”
serioa da eta bertigoa eragin dezake. Gure ardura edo gure erantzunkizuna
jartzen du jokoan.
Pertsonok gehiegitan
jokatzen dugu begirale hutsak edo tabernako tertuliakideak bagina bezala.
Asaskatzeko edo, balorazio orokorrak egiten ditugu: “Zer txarto dagoen dena!!”. Beste batzuetan, gure borondate ona
guztiz teorikoa izaten da: “oxala…”,
“nahiko nuke….”…
Baina ez da nahikoa
predikatzea, garia eman behar baita. Gutako bakoitzak erantzun pertsonala
eskaini behar du, erantzun konkretua. Eta lanari ekin behar dio. Mundua
konpontzeko, eskuak behar baitira.
Beharrezkoa da konpromiso
aktiboa. Ekinik gabeko konpromisoak gurpilik gabeko bizikletak beste balio du;
ez du inora eramaten.
Eta guk norabait iritsi
nahi dugu. Horregatik, lehenengo mundu honetan, goizero, gogotsu eta lagun
hurkoaren alde ekiteko asmoz jaiki beharko genuke.
Hona hemen asko on
batzuk:
Joan XXIII.aren lasaitasunari buruzko dekalogoa
1. Gaurkoz, eguna beste barik bizitzen saiatuko
naiz, nire bizitzako arazoa oso-osorik behingoz konpontzen aritu barik.
2. Gaurkoz, nire itxura ahal dudan guztian
zainduko dut: atsegina izango naiz jokaeran; ez dut inor kritikatuko eta ez
naiz inor (neure burua izan ezik)
hobetzen edo diziplinatzen saiatuko.
3. Gaurkoz, zoriontsu izango naiz,
zoriontasunerako (ez bakarrik beste munduko zoriontasunerako, baita mundu
honetarako zoriontasunerako ere) sortua izan naizen ziurtasunean.
4. Gaurkoz, gorabeherei moldatuko natzaie,
gorabeherok nire nahiei/gurariei molda dakizkien nahi izan barik.
5. Gaurkoz, nire denboratik hamar minutu idazki
on bat irakurtzen emango ditut, jatekoa gorputzaren bizigarri den bezala,
irakurgai ona arimaren bizigarri baita.
6. Gaurkoz, ekintza on bat egingo dut eta ez diot
inori esango.
7. Gaurkoz, egin nahi ez dudan gauza bat, bat
gutxienez, egingo dut; eta nire sentimenduak minduko balituzte, saiatuko naiz
inor ohartu ez dadin.
8. Gaurkoz, programa zehaztua egingo dut. Agian
ez dut beteko, baina idatziko dut. Eta zorigaitz bitatik babestuko dut nire
burua: presatik eta zalantzatik.
9. Gaurkoz, bete-betean sinetsiko dut,
gorabeherek aurkakoa frogatu arren ere, Jainkoaren probidentzia munduan inor
gehiago ez balitz bezala arduratzen dela nitaz.
10. Gaurkoz, ez naiz ezeren beldur izango.
Bereziki, ez naiz beldur izango ederra denaz gozatzeko eta ontasunean
sinesteko.
GOGOETARAKO
Zer
egin nahi duzu GAURKOZ denok mahai berean eseri gaitezen?
